كاظم خبط الجلوري زهبر سعبد المخزومي

[غريب الدار]

رداً على قصيدة شاعر صدام


---1984 قم المقدسة

قصيدة شعرية لشاعر صدام (كاظم خبط) من اهل الديوانية والذي يصف بها ثورة صدام ويرمز لها برمز(صبيحة) ويصف كيفية دخولها الى مدينة الديوانية وماهية تأثيرها على مدينة الديوانية وهذه القصيدة ومع الرد عليها: للشاعر زهير سعيد المخزومي


لشاعر صدام كاظم خبط

شط الديوانية ايفرفح من مرت من يمه صبيحه

من زلفچ يحبيبة انطيني وخليلي من عطرچ ريحه

ومدري البيت اشلون ايلمهه ومدري اشلون امها اتغطيها

وحتى الوردات ايعرفنها وحتى العصفور امتانيها

چا ليش ايلوب البطران موحگك تتسودن بيها

ضحكت وتبلط حي رفعت وطگ حي العصري ابساتين

بيوت الطين اقصور ارتفعت لا رد الله ابيوت الطين

ابردي اشباط ايطيح المشمش وبكانون ايروج التين

وحتى الرگي اتغيّر طبعه ويطلعلك شرط السچين

وحتى امحيسن راعي الگهوه رد شاب وعاف التسعين

والاورزدي إيفتح غبشه ويگلها اختاري اشتردين

وسوگ التجّار ايگوملها شتفصلين وشتلبسين

وحتى الشط يحلف من تزعل يزعل عالماي وعالطين

وكلكم زلم ونسوان اتعرفوهه وعاشت بيكم ساعه بساعه

ولو ماهيّ الزرع ايموت ويتيتم منجل الزراعه

ولاتنّور ايضوگ الحنطه ولانشتم ريحة فرگاعه

يابويه اشگد طماعين ابحبها وهيّ اشگد طماعه

ثورة تموز المحبوبه وبيه الخير ايفتح بـاعه

انتهت القصيد وهنا يأتي الرد عليها

* * * * * * * * * * * * *

للشاعر زهير سعيد المخزومي

وك شط الديوانية اتعكر من اعليه مرت صبوحه

وجف مايه وتفطر طينه من رادت صبوحه اتلوحه

وماتن كل شجرات العشط وگام ايلوب الشط بجروحه

ويكويظم من مرت عالشط چانت معروفه ومفضوحه

ورديت انت النوب اتگول مدري البيت اشلون ايلمهه

ومدري اشلون امها اتغطيها

وك يكويظم تدري البيت اشلون ايلمهه

خلت سيف اعله ارگاب اهله وكل اهل البيت معاديها

وتدري اشلون امها اتغطيها

اتغطيها امها بثوب العار امها امريكا اتحن اعليها

وك يكويظم

حتى الوردات ايعرفنها غدارة اتخون براعيها

واعله شجيرات البستان ماظل عصفور متانيها

صح ضحكت

ضحكت وتهدم حي رفعت ومات بحي العصري الدين

وقصور الحي كلها انهارت وگعت حتى ابيوت الطين

وبنيتوا البارات اعليها وياريت اعله ابيوت الطين

ملت كل الوالدم منكم لا رد الله البعثيين

وصح الرگي اتبدل طبعه

لاچن من الزين الشين

ونخل الديوانية اليزهي بعروگه ايحز السچين

وحتى الريل اتغيّر وضعه وگام ايصيح بصوت احزين

وبساتين الديوانية اتموت بكل لحظه وكل حين

وتدري الديوانية احزينه وبيها اتعيش المصريين

إجتّى وهدمت كل مضيف وشبت بركانه النارين

ولا بوجاغه الدلّه اتفور ولاظلت عدها افناجين

ضحكت واكلت كل اخواني ومنعت رزق المحرومين

وغرّت كل الباع الغيره وحتى اكويظم هالمسكين

يتخبط بالوحله بشعره وباع الدين بدينارين

وتدري امحيسن راعي الگهوه

اعدمتوه بسنة السبعين

چان اشبيب يخدم ربعه ايعيش وي اهله ومتونسين

شنهو اللي سواه امحيسن

گال انريد الدين الدين لا منريد البعثين

والاورزدي ايفتح غبشه لاچن ميگلها اشتردين

يحزن من تتگرب يمه

ويكثر حزنه ويكبر همه ويگوم ايصب دمع العين

تتذكر من گامت تفتر

ومن طبت سوگ التجّار صار ايعيش ايامه اسنين

وحتى الشط يحزن من تجبل ويجف منّه الماي وطين

ونسوان وزلم ايعرفوها تكشّر كل لحظه وكل ساعه

وتبلع منهم خير الناس يكويظم بلوه وطرگاعه

ويوم المرت عالزراعه كسرت منجل كل زراعه

وموبس هاي...

حبست عن زرعاته الماي وصارت صبخه وملحت گاعه

ومرت ببساتين الحمزة اتگول آفه واكلت زراعه

ولافلاّح اليزرع بيها ولاناطور الينطر گاعه

تنورچ شاجر يصبيحه يحرگ كل يوم اهل الطاعه

ابدال الحنطه ايذوب اگلوب ولصبيحة صارت فرگاعه

وتدرون اشگد طماعين وبيكم هيّه اشگد طماعه

منها اتريدون الدينار ومنكم هيّه اتريد الطاعه

لا تحچون ولاتگولون وعالذل ناموا وانتوا اجواعه

وتدريون اشگد ذبحت وادم...وهجت عن بلادي اسباعه

وطلبت من كل السفّانه كلمن بيده ايشگ اشراعه

وماتت جوع الوادم منها وظلت هالوام ملتاعه

زمرة تموز الملعونه ذبحت شعبي وشلت باعه

وانت اكويظم هم انسيت شسوت هالزمرة الملعونه

انسيت بهاي الناس اشصار

چنه احنه ابافراح انزغرد وكل واحد مرتاحه اجفونه

يكويظم جونه الكفّار

وگالو احنه الكم انصار

وگاموا عن ديرتنه الحلوه شويه اشوي عنها ايزيحونه

وگمنه انصيح بعالي الصوت لالا ما نطلع ذبحونه

لو يحكم ببلادي الدين لو يتبدل طعمه ولونه

يكويظم

وبسم خنجرهم ساعة غفله ولن طعنونه

يكويظم هم تنسى الثورة اللبتْ إلها اضلوع الوادم

ودگينه إلها بكل ابلادي سچّه باسم الدين الغانم

واطلعنه انهوس بالديرة وگعدت كلها وما ظل نايم

وطبينه الزنزانات احنه اصفوف اصفوف وام ظل سالم

نسيت الشعله الهبت كلها وصاحت وي اهل البيّاع

واهل الكراده وي الثورة صاحت وتماشيها اسباع

يكويظم مو هاي الثورة وسفه اعليها اتنام الگاع

هم انسيت الصدر الثاير حين بصوته دوى وصاح

ولبينه يكويظم كلنه امشينه وياه اسيوف ارماح

گال انريد احنه الاسلام مو صدام ولا طلفاح

وك نادانه بحلو الصوت وحتى البلبل لبّه وصاح

وتحزمنه باسم الباري وهبينه انضحي الارواح

وجدم روحه الصدر الثائر وابعد عنه بليل وراح

وك صرخاته بسجن الظالم إلها اهتز البرد ومايه

وراح كل اطيور الحضرة يم حيدر راحت نعايه

وردت يم احسين الثورة يكويظم راحت شچايه

ونخل ابلادي لوه ارگابه وشط الحله اتنشف مايه

وهجت كل شبان اعراگي بعزتها اتعنت بالراية

شمالك يكوظم وي ربعك غركم صدام بديناره

ومنك حتى الغير سلبها ومو هذا الظن بالشعاره

واحنه انخبرك ها يكويظم ناوين احنه انشب الثورة

وعشاگ احسين محزمين بعزم الله وإيمانه وصبره

ولازم ناخذ ثار الساده

وما نتراجع يللي اتغني باسم اصبيحه

ويدور الدهر بدولابـه والنه الفرحه

تحياتي للجميع